Distintos concellos da comarca reviviron a tradición este primeiro de maio
02 may 2024 . Actualizado a las 13:03 h.Como cada primeiro de maio, este mércores distintos concellos da comarca de Pontevedra reviviron a secular tradición da Festa dos Maios. E todo iso nunha xornada marcada polas persistentes choivas, que non impediron, en todo caso, que veciños e visitantes gozasen desta celebración, aínda que fose baixo cuberto.
Así, ocorreu no caso da praza da Ferrería de Pontevedra, onde a media ducia de agrupacións que participaron puideron desenvolver as súas cántigas baixo unha carpa. A poeta Cynthia Menéndez foi a encargada de darlles a benvida, namentres que o xurado determinou que o Maio da Asociación Cultural de Campañó merecía os primeiros premios ao Maio, Cantigas e o Especial Maios, mentres que o do CEP de Campolongo acadaba o adicado á Interpretación; o do CEP Marcos da Portela, o premio á Coroa; e o de Figueirido o do Especial do Xurado.
Tamén se tivo que habilitar unha carpa, neste caso con cambio de ubicación incluído, no caso de Poio. Así, en lugar de celebrarse na praza do Mosteiro, a ducia de Maios participantes desprazáronse ate A Seca, onde foron premiados Maiolo nas categorías de Conxunto, Maio e Coroa, Marepodim na de Barco, Vilariño na de Actuación e Pimpín na de Coplas.
Ademais, por primeira vez, dispensouse unha homenaxe a un veciño pola súa implicación nesta festa. Así, rendeuse tributo a Francisco Lobajeira Pérez, de 81 anos e con domicilio en Arís, por ser unha das persoas que contribuíron, nas últimas décadas, a difundir, conservar e expandir a tradición dos Maios en Poio.
Xa pola tarde, e pendentes da climatoloxía, a Festa dos Maios desprazábase á praza da Chousa, en Combarro, coa colaboración do Ateneo Corredoira.
En Caldas de Reis, pola súa banda, a cita trasladouse por mor do tempo á Tafona, onde o Maio Celta foi premiado ao mellor engalanado, mentres que a mellor copla recaeu en Teenagers Politiqueiros e a mellor interpretación en A Clave do 5. O Premio Especial de Participación foi para o Maio Esparteiro.
Marín, Sanxenxo e Vilaboa
No caso de Marín, un total de nove Maios e sete Embarcacións participaron nesta cita organizada como ven sendo tradicional polo Ateneo Santa Cecilia. Se durante a mañá levouse a cabo unha exhibición na alameda, pola tarde desenvolveuse o concurso no multiusos da praza de Abastos en lugar da ubicación inicialmente elixida, a praza do Reloxo. Outro dos concellos que optou por celebrar a Festa dos Maios en horario de tarde foi o de Vilaboa cunha convocatoria no campo das festas de Bértola.
De igual xeito, o Círculo Cultural Deportivo de Sanxenxo ía celebrar tamén en horario vespertino o concurso exhibición na Cultural coa participación de catro Maios despois de que, por mor das previsións de choiva, decidisen suspender a exposición na praza Pascual Veiga.
Pola contra, e sen saír do Concello de Sanxenxo, a Asociación de Veciños San Cristóbal de Portonovo mantivo a programación tal e como estaba inicialmente prevista ao organizar a Festa dos Maios na praza do Mercado desta localidade.